哈姆仔啲日誌（二）

最近都會落雨，提醒朋友仔記得帶雨具，仲有雨水天氣屋企容易潮濕，記得留意哈姆屋企嘅木屑要保持乾燥清爽；好多朋友仔like我嘅上一篇日誌，哈姆仔係呢度多謝各位朋友仔對哈姆爺爺嫲嫲嘅關心；

係哈姆爺爺嘅飲食方面，朋友仔可以留意到佢地力氣逐漸減弱，經常會咬唔郁食物，最好可以用研鉢將食物整到碎碎或者係磨成粉狀再俾佢哋食；

每日俾哈姆爺爺一小片蔬菜或者生果，將蔬菜清洗乾淨，用溫開水過一過，避免會有細菌；而生果嘅話，要洗淨去皮去籽再餵比哈姆爺爺食；佢地可以吸收維他命，同時可以通暢屙臭臭；另外，如果要補充哈姆爺爺嘅身體營養，因爲每個嘅身體情況唔同，通常要問返熟悉哈姆爺爺嘅醫生哥哥姐姐啦；

俾哈姆爺爺一個唔障礙嘅空間，由於佢哋嘅關節已經慢慢退化，所以哈姆爺爺嘅屋企要儘量平坦，屋企裡面嘅傢俱最好矮小平坦，等佢行起身可以唔洗太嘥力，例如裡面嘅細竇同食嘢嘅碗仔換返開口淺小小嘅，咁樣哈姆爺爺比較容易爬入去；

哈姆爺爺嘅水瓶都要掛低小小，等爺爺容易飲到水；朋友仔應該隨時keep住乾淨舒爽嘅環境同衛生，咁樣可以避免可惡嘅細菌傳播；

如果哈姆爺爺鐘意出來散步，朋友仔可以多陪陪哈姆爺爺，選擇係平面要注意安全，散步時間太長嘅話，哈姆爺爺會容易攰；細心嘅朋友仔可以係哈姆爺爺嘅耳仔後面同背部，用手指頭輕輕摸摸或者按摩，咁樣就舒服嗮，整個大大嘅Good俾各位朋友仔。