嚟自老貓嘅第四封信

親愛嘅老友：

又到聖誕~！又到聖誕~！老友記係呢度祝各位老友Merry Kissmas~！尋晚平安夜有老友親自下廚嘅聖誕大餐，飯後老友又變身聖誕爺爺係我被竇擺低聖誕禮物---一個同我咁大嘅公仔。

多謝老友依然記得我鐘意公仔，仲記得細細嗰嘅時候，妳驚我自己一個人係屋企無聊，就買咗個毛絨絨嘅玩具陪住我，等我可以成日錫下佢陪住佢玩，到而加都仲系屋企；記得每一次我將玩具整邋遢嘅時候都有老友幫我同佢洗白白，洗完之後乾乾淨淨，最鐘意同香香嘅玩具一齊覺覺豬啦；

唔好睇我慢慢變咗爺爺/嫲嫲，其實我係一個“老頑童”嚟噶，仲係鐘意挪住個公仔玩一玩，放鬆下手腳，多滴鍛鍊嘅機會；呢次老友送嘅大公仔又可以俾我靠住舒舒服服咁樣訓覺，真係諗下都sweet；

除咗公仔之外，最鐘意嘅就係老友幫我重新裝飾嘅聖誕紙板箱-- 係我嘅專屬梳化，適合軟瀨瀨咁樣訓係箱裡面，今次嘅紙板箱多咗喵咪出口，等我係箱裡面嘅時候仲可以睇到出面, 多謝老友嘅細心設計；

哩埋係箱入邊發吽哣，思考喵咪哲學；亦都方便我安安靜靜咁樣嗑眼訓, 或者訓醒之後同紙皮玩“仆哩哩”，等我可以盡情享受自己一個嘅獨處嘅時間，俾我一個安心舒適嘅環境，喵喵老友記表示非常滿意。

老友記認爲眺望戶外思考係思考喵咪哲學最有效嘅方式之一，多謝老友知道我年長冇以前咁方便，所以每一次都會係近窗口嘅位置特別幫我擺低幾本厚厚嘅書或者有個方便上落嘅樓梯仔，俾我一個遠望嘅空間同時間；

雖然出面嘅世界真係好大好靚，但係魅力不及老友妳，所以老友記依然會選擇同妳一齊開開心心過每一日，繼續互相陪伴。

係妳愛錫嘅老貓(上)